النهاردة مش هشارك لا بزجل ولا أشعار
النهاردة بس جاية أحكيلكم قصة الانفجار
جاية وشايلة فوق كتافي قبل منكم حمل عار
عار عروبه راحت وسط زحمة الانهيار
عار شعوب سابت ايديها واتبنى بينها جدار
كل واحد قال يا نفسي وانهدم ما بينا الدار
مش اخويا ولا ابن عمي يلا هنبلغ فرار
يوم ما تمشي جوه بلدك مش مالك فيها القرار
يوم ما تمشي صح تلقي حوالين منك حصار
ويوم ما تغلط جوه منك تلقي نظرة الانتصار
ايه الجديد؟؟
ايه الجديد لما يحصل انفجار
لما بدم بارد يتقتل كبار وصغار
لما تلقي الارض شاربه من دمك مرار
مرار الصمت فينا اللى كفـّن الاحتضار
والنتيجة !!
يلا نشجب .. يلا نرفض بس ما بننطق قرار
والمقابل !!
لا ندم ولا تعويض ولا حتى اي كلمة اعتذار
المقابل كل مره كلمه واحده ..
ويادار ما دخلك الاشرار
روحتى فين يا عروبه منا .. إختفيتي كالبخار
كان ف يوم فيكي صلاح الدين فاتح المقدس
وقطز هازم التتار
كان فيكي أشرف الخلق محمد النبي المختار
روحتى فين يا عروبه منا محتاجينك للعمار
محتاجين نروي ضلوعنا اللى ماتت جوة قسوة الاختيار
