الخميس، ١٠ فبراير ٢٠١١

ثــورة وطـــن

ثــورة وطـــن


 
قومي يا بلد .. فرجيهم .. وإنـزعي عنك حجابك

عرفي العالم بحاله .. اللي بيعملوه شبابك

قومي .. هيجي .. وعرفيهم إن فيكي قلب نابض

قلب كل سلاحه كلمه قالها بعلو حسه .. رااافض

رافض الظلم اللى فيكي

رافض تتكبل ايديكي

رافض انه يحرسك اللى فاكرينه .. حاميكي

وهو نفسه اللى بايديه .. خانك .. وباعك

واللى يوم ما حررك ..

حطك بين إيديه وكفنك..

وغسلك .. بدم ولادك الطاهرين

نسي الامانه .. والعهد .. نسي اليمين

لكن .. قالها رب العالمين

اللى فيكي .. آآمنين

يبقي ازاي عاوزين يسرقوا منك آمانك؟؟

ويزيفوا .. ويبدلوكي ويخلوا الظلم عنوانك

قومي يا بلد .. وإعلني .. إن دولا مش ولادك

وإنك اتبريتي منهم .. وإنهم ما يخطوا بابك

قومي يا بلد .. ثوري .. وإكشفي قلب الحقايق

فرجي العالم ع اللى جواكي بيكدب واللى منك قلبه صادق

اللى خانوكي وباعوكي وكانوا هما الحرس

ولا اللى نزلوا وحاموكي واداس عليهم بالفرس

قومي يا بلد واكشفيهم ..

وأُرفضيهم ..

وألفظيهم ..

واوعي حتي تقبليهم لو جولك في يوم متكفينين

اوعي تقبلي ترابك يحضن ثراهم الغرقان بدم الغلبانين

اوعي تخذلي شبابك اللى ماتوا والإيدين بالرايه مرفوعين

إسلام وأحمد وسالى .. وميه غيرهم أو ميتين

كان حلمهم يشوفوا فيكي النور في ايد الشقيانين

ولما الدنيا تقسي عليهم يناموا وهما دفيانين

كان حلمهم يشوفوا ولادهم متعلمين

دكاتره ومهندسين ومدرسين .. لكن يكونوا مبدعين

كان حلمهم .. نعيش بكرامة واحنا روسنا مرفوعين

اما أخر كلمتين ..

بحبك يا بلدي .. وعلى عهدك هفضل امين

ماإنتى أم الدنيا وأم كل المصريين

وفيكي هقول الشهادة .. وعلى أرضك هـرّسي الجبين



بقلم / do3aa el-shoprawy
10 /2/ 2011




هناك ٦ تعليقات:

  1. وااااااااااااااااااااااااو

    رااائعه يا دعاء


    قومي يا بلد .. فرجيهم .. وإنـزعي عنك حجابك

    عرفي العالم بحاله .. اللي بيعملوه شبابك

    قومي .. هيجي .. وعرفيهم إن فيكي قلب نابض

    قلب كل سلاحه كلمه قالها بعلو حسه .. رااافض



    ما شاء الله يا دعاء .. بجد برافو

    ردحذف
  2. السلام عليكم ورحمة الله وبركاته
    اخير ا كتبتى لنا حاجة كده
    اتاخرتى علينا جدا بس رجعت بكلماتك الاكثر من رائعه
    جميله جدا كلماتك يادعاء
    سلمت يداكى
    ماشاء الله عليكى

    ردحذف
  3. عليكن السلام ورحمة الله تعالي وبركاته

    مها البنا
    الرائع هو انتى اخيتي
    دوما ينال قلمي شرف تقييمك الايجابي
    دمتى لي دوما اخيتي الحبيبه


    وااايزي
    اهو من انفعال اللحظه بقي يا وايزي
    معلش دايما متاخره
    مانتى عارفه الحبر بقي غالي هههههه

    سلمتم لي اخواتي الحبيبات
    احبكن في الله

    ردحذف