الأحد، ٢٨ مارس ٢٠١٠

شخابيط ع الورق






علي نهج عمنا صلاح جاهين ورباعياته


دى كانت شخابيطي ع الورق

مالي كدة زعلان ومدايق
مالى شايل فوق كتافي هموم خلايق
مالي شايف نفسي كبرت وشعري وشايب
وانا اللى لسه فى الحياة .. مبقاليش دقايق
**********************
بحلم ببيت يضمنى مع زوج حنون

بحلم وحلمى مش من انواع الجنون
وحق من أمره بين الكاف والنون
ان أراد شيئا قاله له كن فيكون
*************************

ليلي طويل ملوش آخــــر
من غير لا أصحاب ولا خلااان
بجيب الماضي ع الحاضـــر
وببقي في وحدتي بردااان
*************************

الضحك غالي .. والفرح غالي

والحزن عشش ف القلوب

فى حكمه اكيد م اللى بيجرالي
وراضي يارب بالمكتوب
*************************

قول يا قلم واصرخ واكتب قصايد

قول وقوي كلمتك وسط الخلايق
جايز يقولوا عليه ده كلام جرايد
وجايز يشوفوا ان هى دى بجد الحقايق
قول واكتب كلام موزون في شكل رصين
واسطر حروف من سحرها يزيد الحنين
قول وعلمنا وزيد علينا في المعاني اتنين
معني الضحكة لمـــا تخرج ويغلفها الانين
ومعني الجرح لما ينزف وتداويه دموع العين
يا قلم يا صاحبي من زمااان
حاسس باللى فيه واللى كان
قادر تشوف من غير عيون
وقادر تداوي اللى باقي من انسان
**********************
 
إحلــم

ما الحلم هو اللى فاضل
من بقايا ماضي عاطر
كان مليان حب ومشاعر
احلم يا صاحبي وايه يضر
دا اللى جوه الناس أمر
من مجرد حلم عابر
لا بينفع حد ولا بيضر
***********************
وللشخابيط بقية






الأحد، ٢١ مارس ٢٠١٠

إلي أمي .. أهديكي ..

البــــــدايـــة

حست انى جوه منها

كل يوم بيعدى فيه بيزيد حنانها

عاشت معايا

اياااااام كتيرة

تحكي حكاااوي .. تقول غناوي

مستنية بصبر طيب تشوفنى عينها

وجيت في ليلة ..

بدأت أخبط .. وهي تبكي

عاااااوز أخرج ..

واستحملت ألالام ولادتى

وأما فاقت ..

دفت برودتى بحضن منها

وفضلت أكبر .. وهي جنبي

بدأت أحبي ..

بدأت أمشي ..

وأول إيدين مسكت إيدية .. إيدك يا أمي

وكل ما أكبر تزيد مشاكلي

وهي جنبي ..

ما بتشوف عنيها الا راحتي ..

الجمعة، ١٩ مارس ٢٠١٠

معــــرض صــور


حـــاولت أرسم صورة لنفسى

صورة لذاتى اللى شايفها
صورة لملامحى اللى عارفها
وأما مسكت ورقى وقلمى ..
لقيتنى تااايه مش عارفنى
مش شايف صورة لملامحى
....
حاولت تاانى وقلت أجرب
يمكن بخط .. اتنين أأقرب
لقتينى برسم طفل بيلعب
عايش طفولته
عايش برائته
بس لمحت بين صوابعه
حتة حجـــر
تحميه فى لحظه م الخطر
فى لحظه غدر م البشر
ولمحت فى عينة نظرة تحدى
نظرة نصر جااااااى بيدى
هحررك يا قدس
بروحى وبدمى
وبحجرى ...
بصيت كده .. وسئلت نفسي
مين اللى شايل ملامح رسمي
ده مش انا .. ولا حتى شبهي
***
وحاولت تاانى من جديد
ومسكت الورقه والقلم
يمكن المره دى أصيب
واجيب ملامحى م العدم
لقتنى برسم ناااس كتيرة
متقسمين اعداد كبيرة
تايهين ما بين سنه وشيعه
لقيت عراق الطيبه
متعـــذبه
ما بين جنود الامريكان
اللى احتلو ارضها
وما بين شعبها الغلبان
اللى دايب فى عشقها
ولقيت فى جنب من بعيد
شباب كتيير ارادته حديد
ناوى يوحد ..
ناوي يعمر ..
ناوي يبني عراق جديد
وحاولت أدور وسطهم .. يمكن اشوفنى
بس ملقتليش أثر .. ولا حتى حد هناك عرفني
***
وحاولت تانى أرسم وأدور
يمكن اللى تايه منى .. يظهر
لقيتني برسم صورة راجل ظهره محني
عدى عليه الزمن .. وباينه منسي
سئلته مالك يا عم قاعد حزين
قالي يا بنى دا بفعل السنين
سألتة تاني : قولي مالك ؟؟
قالى : أبني
جابني هنا .. وراح وسابني
مقالش حتى ده غصب عني
بس عازره .. أيوة عازره
ماهي الحياة مبقتش سهلة
داير يلف زى الطور جوة ساقية
والاسعاركل يوم عمالة تغلي
والحياة بقت صعبة
وإيش يعمل المحكوم فى حكومة باتت نايمة
***
بصيت كده وقعدت أفكر
إيه كل ده ؟؟ .. عقلي إتحير
انا مين فى دول ؟؟
أنا كل دول ولا أنا مخفي؟؟
لقيت إجابتى سابقه همسي
إن أنا .. اللى جوة رسمي
أيوة انا .. انا كل دول
لا تقولي فلسطينى ، ولا عراقي . ولا حتى مصرى
انا العربي ..
أنا العربي ..